တင်းတိမ်ရောင့်ရဲခြင်း
••••••••••••••••••••••••••
အဗူဟူရိုင်ရဟ် (ရသွိ) ထံမှဆင့်ပြန်လာရှိသည်။ တမန်တော်မြတ်(ဆွ) မိန့်ကြားသည်မှာ “ ချမ်းသာကြွယ်ဝ ခြင်းဆိုသည်မှာ ပစ္စည်းဥစ္စာအမြောက်အမြားရှိခြင်းကိုခေါ်သည်မဟုတ်ပေ။ ချမ်းသာကြွယ်ဝခြင်း စင်စစ်မည်သည် တင်းတိမ်ရောင့်ရဲခြင်းဖြစ်သည်။” (ဗုခါရီကျမ်း၊ မွတ်စ်လင်မ်ကျမ်း)
မွတ်စ်လင်မ်များသည် အရှင်မြတ်ပေးသနားထားသော စည်းစိမ်များ၊ ငွေကြေးဥစ္စာများအပေါ် တင်းတိမ်ရောင့်ရဲရမည်။ တစ်ခုရပြီးလျှင် မရောင့်ရဲနိုင်ဘဲ နောက်တစ်ခုနောက်လိုက်ပြီး အလ္လာဟ် သတ်မှတ်ထားသည့် တာဝန်ဝတ္တရားများ ပျက်ကွက်သည်အထိ ပစ္စည်းဥစ္စာတွေ အပေါ်မက်မောနေတာမျိူး မလုပ်သင့်ပေ။
အလွန်ကောင်းသည့် ဟဒီးဆ်တစ်ပုဒ်လာရှိသည်။ တမန်တော်မြတ်(ဆွ) မိန့်တော်မူတယ်။ "အာဒမ်၏သား(လူသား)သည် ရွှေများနှင့်ပြည့်နေသော တောင်ကြားတစ်ခု ရလျှင် ဒုတိယတစ်ခု လိုချင်မည် ဖြစ်သည်။ ဒုတိယတစ်ခု ရလျှင်လည်း တတိယ တစ်ခု လိုချင်ဦးမည်။ အာဒမ်၏သား(လူသား)၏ ဝမ်းကို သင်္ခချိုင်းတွင်းရှိ မြေကြီးမှလွဲ၍ အခြားအရာက မဖြည့်ပေးနိုင်သောကြောင့်ပင်။ ထို့ပြင် အလ္လာဟ်အရှင်မြတ်သည် သူ၏ဘက်သို့ပြန်လှည့်၍ တောင်းပန်သူများကို ခွင့်လွှတ်တော်မူသည်။" (ဗုခါရီကျမ်း)
ထိုသို့သော သူများသည် သေခြင်းတရားက သူတို့ကို ဝါးမြိုသွားသည့်တိုင် လောဘမသတ်နိုင်ကြပေ။ ပစ္စည်းဥစ္စာမက်မောခြင်းနှင့် ပတ်သက်၍ ကုရ်အာန်တွင်လာရှိသော အာယသ်များကို ကြည့်ကြပါစို့...
“သူ့ထက်ငါပြိုင်ဆိုင်ကြွယ်ဝလိုမှုက အသင်တို့အား (အလ္လာဟ်အရှင်မြတ်၏အမိန့်ကိုနာခံခြင်းမှ) မေ့လျော့စေခဲ့သည်။နောက်ဆုံးတွင် အသင်တို့သည် သင်္ချိုင်းများကိုတွေ့မြင်ခဲ့ကြရတော့သည်။“
ကုရ်အာန် (၁၀၂:၁-၂)
ကာရူန်ကို မနာလိုသည့် လောကစည်းစိမ်မက်မောကြသောသူများကဲ့သို့ မဖြစ်ကြရန် ကုရ်အာန်တွင် ဆုံးမထားသည်။ ကာရူန်သည် သူ၏ ဘဏ္ဍာတိုက်များ၏ သော့များကို လူသန်ကြီး လေးငါးယောက်က သယ်ရသည်အထိ စည်းစိမ်ဥစ္စာ ချီးမြင့်ခံထားရသူဖြသ်သည်။ အစတွင် သူသည် တမန်တော် မူစာ၏ နောက်လိုက်များမှ ဖြစ်သည်။ သူတော်သင်များက သူ့ကို ဒီလောက ဥစ္စာကို ရှာဖွေတာဟာ ခွင့်ပြုထားပေမယ့် နောင်တမလွန်ဘဝ၏ ရည်ရွယ်ချက်ကို လျစ်လျူရှု၍ မရကြောင်း သတိပေးခဲ့သည်။
“အမှန်စင်စစ် ကာရူန်သည် (တမန်တော်)မူစာ၏ (ဆွေမျိုးသားချင်းများ)ထဲမှပင် ဖြစ်ခဲ့သည်။ ထို့ပြင် ထိုကာရူန်သည် ထိုအမျိုးသားများအပေါ်တွင် မာနထောင်ခဲ့သည်။ ထို့ပြင် ငါအရှင်မြတ်သည် သူ့အား အဘယ်မျှ ရွှေငွေဘဏ္ဍာများကို ပေးသနားထားသနည်းဆိုလျှင်၊ ထိုရွှေငွေဘဏ္ဍာများ(ကို သိုလှောင်ထားသော ဘဏ်တိုက်များ)၏သော့များသည် ခွန်အားဗလနှင့်ပြည့်စုံသော လူတစ်စုကိုပင် အမှန်ပင် မနိုင့်တနိုင်ဖြစ်စေသည်။ တစ်ခါက သူ၏အမျိုးသားများက သူ့ကို ပြောဆိုကြသည်- “အသင်သည် ဂုဏ်မမောက်နှင့်၊ အမှန်စင်စစ် အလ္လာဟ်အရှင်မြတ်သည် ဂုဏ်မောက်သည့်သူများကို နှစ်သက်တော်မမူပေ။“
ကုရ်အာန် (၂၈:၇၆)
“ထို့ပြင် အသင်သည် အသင့်အား အလ္လာဟ်အရှင်မြတ်က ပေးသနားတော်မူခဲ့သော (ရွှေငွေများ)အထဲမှ တမလွန်ဘဝကို ရှာဖွေပါ။ ထို့ပြင် အသင်သည် ဤဘဝမှ အသင်၏ဝေစုကို (တမလွန်ဘဝသို့ ယူဆောင်သွားရန်) မမေ့နှင့်။ ထို့ပြင် အသင့်အား အလ္လာဟ်အရှင်မြတ်က ကျေးဇူးပြုသကဲ့သို့ အသင်လည်း (သူများအား)ကျေးဇူးပြုပါ။ ထို့ပြင် အသင်သည် တိုင်းပြည်တွင် ဖျက်ဆီးမှုကို မလိုလားနှင့်။ အမှန်စင်စစ် အလ္လာဟ်အရှင်မြတ်သည် ဖျက်ဆီးသည့်သူများကို နှစ်သက်တော်မမူပေ။”
ကုရ်အာန် (၂၈:၇၇)
ကာရူန်သည် သတိပေးချက်ကို နားမထောင်ခဲ့ပေ။ အောင်မြင်မှု အစစ်အမှန်ကို နားမလည်ကြသော စည်းစိမ် ဥစ္စာမက်မောသူတို့သည် သူ့ကို မနာလိုသော အကြည့်များဖြင့် ကြည့်ခဲ့ကြသည်။
“ထို့နောက် သူသည် သူ၏အမျိုးသားများရှေ့၌ သူ၏အခမ်းအနားနှင့်တကွ ထွက်ခဲ့သည်။ ဤဘဝကို အလိုရှိသူများက (ဤသို့)ပြောဆိုခဲ့ကြသည်- “သြော်- ကာရူန်ရရှိခဲ့သော ပစ္စည်းဥစ္စာများသည် ကျွန်ုပ်တို့တွင်လည်း ရှိခဲ့လျှင် ကောင်းလေစွ၊ အမှန်စင်စစ် သူသည် ကြီးကျယ်သော နဖူးစာဝေစုကို ပိုင်ဆိုင်သူဖြစ်သည်။“
ကုရ်အာန် (၂၈:၇၉)
ထို့ပြင် အသိပညာကို ပေးသနားတော်မူခြင်းခံကြရသည့်သူများကမူ (ဤသို့)ပြောဆိုခဲ့ကြသည်- "အသင်တို့ ပျက်စီးပါစေ၊ အီမာန်ယုံကြည်ပြီး ကောင်းမြတ်သောလုပ်ရပ်ကို ပြုလုပ်ကြသည့်သူများအတွက် အလ္လာဟ်အရှင်မြတ်ထံတော်မှ (ပေးသနားတော်မူမည့်) အကျိုးကုသိုလ်သည် အကောင်းဆုံးဖြစ်သည်။ ထို့ပြင် ထိုအကျိုးကုသိုလ်ကို သည်းခံသူများမှလွဲ၍ (မည်သူမျှ)ရမည် မဟုတ်ပေ။“
ကုရ်အာန် (၂၈:၈၀)
ကာရူန်ဟာ ဆက်လက် ခေါင်းမာနေခဲ့သည်။ တမန်တော်မူစာ၏ နောက်လိုက်များသည် ပစ္စည်းဥစ္စာ အလိုရမက်တွေများပြားတာကြောင့် အလ္လာဟ်ရှင်မြတ်သည် ၎င်းတို့နှင့်၎င်းတို့ရဲ့ ပစ္စည်းဥစ္စာတွေကို ကမ္ဘာမြေကြီးအားဝါးမြိုရန်အမိန့်ပေးခဲ့လေသည်။ မွတ်စ်လင်မ်တွေ အနေနဲ့ မိမိမှာ ရှိတဲ့အရာကို ကျေနပ် တင်းတိမ်ရောင့်ရဲရမှာဖြစ်ပြီး သူများဥစ္စာပစ္စည်းအပေါ် မကောင်းတဲ့ မျက်လုံးနဲ့ မကြည့်သင့်ပေ။
တမန်တော်မြတ်(ဆွ) ပြောကြားခဲ့သည်မှာ"အကယ်၍ တစ်ဦးတစ်ယောက်က မိမိထက် ရုပ်ရည်အရာမှာ သို့ ကြွယ်ဝချမ်းသာမှုမှာပိုသာနေရင် ကိုယ်က အဲ့အချိန်မိမိထက် နိမ့်တဲ့သူကိုသာကြည့်သင့်ပါတယ်။ အဲလိုကြည့်ခြင်းဖြင့် မိမိကပိုသာနေတာတွေ့ပါလိမ့်မယ်။” (ဗုခါရီကျမ်း)
••••••