အစ္စလာမ်နှင့် ပတ်သက်၍ အမေးများသော မေးခွန်းများ
တမန်တော် မိုဟာမဒ် ဟူသည်…
တမန်တော် မိုဟာမဒ် (ဆွ) သည် လူသားတို့အား ဖန်ဆင်းရှင်ကို ကိုးကွယ်ကြဖို့ ဖိတ်ခေါ်ရန် စေလွှတ် တော်မူခြင်းခံရသော တမန်တော်များစွာတို့အနက် နောက်ဆုံးတမန်တော် ဖြစ်ပါတယ်။ သူဟာ လူသားတို့ အတွက် စံပြ ဖခင်၊ ခင်ပွန်း၊ ဆရာ ၊ ခေါင်းဆောင်၊ တရားသူကြီးတစ်ဦး ဖြစ်ခဲ့ပါတယ်။ ရိုးသားသော၊ တရား မျှတသော၊ ကိုယ်ချင်းစာနာတတ်သော၊ သတ္တိရှိသော လူသားတစ်ဦး၏ ပြည့်စုံသော ဥပမာတစ်ခုလည်း ဖြစ်ခဲ့ပါတယ်။ မွတ်စလင်မ်တို့သည် တမန်တော်မြတ်အား အထူးဂုဏ်ပေးလေးစား ကြပါတယ်၊ သို့သော် အခြားသော တမန်တော်များနည်းတူ တမန်တော် မိုဟာမဒ် (ဆွ) အားလည်းမကိုးကွယ်ကြပါ။
v အစ္စလာမ်က အမျိုးသမီးတွေအပေါ် ဘယ်လိုမြင်သလဲ?
အစ္စလာမ်မှာ အမျိူးသားရော အမျိုးသမီးရော မိမိပြုသည့် ကောင်းမှု၊ ဆိုးမှုတို့၏ အကျိုးကို တန်းတူ ခံစားရသည်ဖြစ်၍ ဖန်ဆင်းရှင်ထံတော်၌ အမျိုးသားနှင့် အမျိုးသမီးတို့ဟာ တန်းတူပင်ဖြစ် ပါတယ်။ ကျား/မ နှစ်မျိုးလုံးကို ဖန်ဆင်းတော်မူသော အရှင်မြတ်ဟာ ၎င်းတို့၏ ကွဲပြားမှုပေါ် မူတည်၍ မတူညီသော တာဝန်ဝတ္တရားများကို သတ်မှတ်ပေးထားပါတယ်။ အမျိုးသမီးများကို ရိုသေ လေးစား တန်ဖိုးထားရန် ဆုံးမထားပြီး မည်သည့် ဖိနှိပ်မှုကိုမျှ ခွင့်မပြုထားပါ။
အစ္စလာမ်က အကြမ်းဖက်မှုကိုခွင့်ပြုထားပါသလား?
စစ်တိုက်ရာတွင် ရန်သူမဟုတ်သော အပြစ်မဲ့သူများအား ပစ်မှတ်ထားခြင်းသည် ရက်စက်သော အပြုအမူ ဖြစ်၍ အစ္စလာမ်က ရှင်းလင်းစွာတားမြစ်ထားပါတယ်။ အမှန်တကယ်တွင် အစ္စလာမ်ဟာ မုစ္စလင်မ်တို့အား အပြစ်မဲ့သော လူသားများကိုမဆိုထားနှင့်၊ သစ်ပင်များ၊ တိရစ္ဆာန်များကိုပင် မလိုအပ်ပဲ အလဟဿ ဖျက်ဆီးရန် ခွင့်မပြုထားပါဘူး။ ဤသည်မှာ အစ္စလာမ်က ချမှတ်ထားသော စစ်ပွဲဆိုင်ရာ စည်းမျဉ်း စည်းကမ်းများမှ ဥပမာ တစ်ခုသာဖြစ်ပါတယ်။ သို့သော် အကြမ်းဖက်မှုလား၊ တရားဝင်ခွင့်ပြုထားသော ဖိနှိပ်မှုကို တွန်းလှန်ခြင်းလား ခွဲခြားဖို့ လိုအပ်ပါတယ်။ ထိုနှစ်ခုဟာ အင်မတန်ကွာခြားသောကြောင့် ဖြစ်ပါတယ်။
ဟလာလ်အစားအစာ ဆိုတာ ဘာလဲ?
ဟလာလ်၊ တရားဝင် သော အစားအစာဆိုတာဖန်ဆင်းရှင်က မွတ်စလင်မ်တို့ကို စားရန် ခွင့်ပြုထားသော အစားအစာ ကိုခေါ်ပါတယ်။ ယေဘုယျအားဖြင့် ဝက်သားနှင့် အရက်မှလွဲ၍ အများစုသော အစားအစာများနှင့် သောက်စရာများဟာ ဟလာလ် ဖြစ်ပါတယ်။ အသားအတွက် ကျွဲနွား၊ ကြက်ငှက်များကို လူသားဆန်စွာနှင့် မှန်ကန်စွာ သတ်ဖြတ်ရပါတယ်။ ထိုသို့ သတ်ဖြတ်ရာတွင် ဖန်ဆင်းရှင်၏ နာမတော်ကို ရွတ်ဆို၍ တိရစ္ဆာန်တို့အားလည်း နာကျင်မှု အနည်းဆုံးဖြစ်စေရန် ဂရုပြုရပါမယ်။
ကုရ်အာန်ဆိုတာ ဘာလဲ?
ကုရ်အာန်ဆိုတာဘာလဲ?
👉 ဖန်ဆင်းရှင်၏ နှုတ်ကပါဌ်တော်
ကုရ်အာန်ကျမ်းမြတ်ဟာ ဖန်ဆင်းရှင်ရဲ့ ပကတိနှုတ်ကပါဌ်တော် ဖြစ်ပါတယ်။ အနန္တတန်ခိုးတော်ရှင် (အလ္လာဟ်) ဟာ တမန်တော် မိုဟာမဒ် (ဆွ) ထံသို့ ကောင်းကင်တမန်တော် ဂျီဘ်ရာအီလ်မှ တစ်ဆင့် ပို့ချတော်မူခဲ့ပါတယ်။
“ဤကျမ်းသည် တန်ခိုးအာနုဘော်ဖြင့် လွှမ်းမိုးတော်မူသော၊ အမြော်အမြင်နှင့် ပြည့်စုံတော်မူသော အလ္လာဟ်အရှင်မြတ်အထံတော်မှ ချပေးသနားတော်မူသည့် ကျမ်းမြတ်ပင်ဖြစ်သည်။” (ကုရ်အာန်-၃၉:၁)
👉 လူသားမျိုးနွယ်အတွက် လမ်းညွှန်
ယင်းကုရ်အာန်ကျမ်းတော်မြတ်သည် "လူခပ်သိမ်းတို့အဖို့ တရားလမ်းညွှန်အဖြစ်လည်းကောင်း၊ တရားလမ်းမှန်ရစေပြီး အမှားနှင့်အမှန်ကို ခွဲခြားသိစေသော ထင်ရှားလှသည့်သက်သေလက္ခဏာတော်အဖြစ်လည်းကောင်း (ကျရောက်လာ သောကျမ်းတော်မြတ်ဖြစ်ပါသည်)။" (ကုရ်အာန်-၂:၁၈၅)
ဤကျမ်းမြတ်သည် လူသားတို့ကို အမှန်အမှား ခွဲခြားဆုံးဖြတ်တတ်ရန် လမ်းပြပေးပါတယ်။ ထိုသို့ လမ်းညွှန်မှု မရှိပါက လူသားတို့ဟာ ပျက်စီးဆုံးရှုံးကြရမှာဖြစ်ပါတယ်။
👉 နောက်ဆုံးဗျာဒိတ်တော်
ကုရ်အာန်ကျမ်းမြတ်သည် အနန္တတန်ခိုးတော်ရှင် အလ္လာဟ်အရှင်မြတ်ထံမှ ချပေးတော်မူသော နောက်ဆုံး ကျမ်းစာတော်ဖြစ်ပါတယ်။ ရှေးကကျမ်းစာများ၏ အစိတ်အပိုင်းအချို့တွင် အနည်းငယ် ကျန်ရှိနေသည့် အမှန်တရားတို့ကို အတည်ပြုပေးသော၊ ထိုကျမ်းစာများ၏ ယနေ့ခေတ်ဗားရှင်းများ ထဲသို့ စိမ့်ဝင်လာသော လုပ်ကြံဖန်တီးမှုများနှင့် ဖြည့်စွက်ချက်များကို ငြင်းဆို ပြုပြင်ပေးသော ကျမ်းမြတ်ဖြစ်ပါတယ်။
“အို-ကျမ်းဂန်ချီးမြှင့်ခံရသူအပေါင်းတို့၊ အသင်တို့ထံ၌ရှိသော ကျမ်းဂန်များကို ထောက်ခံလျက်ရှိသော ငါအရှင်မြတ် ချပေးသနားတော်မူသည့် ကျမ်းဂန်(ကုရ်အာန်) ကို သက်ဝင်ယုံကြည်ကြလေကုန်။" (ကုရ်အာန်-၄:၄၇)